சம்போகம்

ஞமலிகள் சாலையில் கலவியில் ஈடுபட்டால், கல்லெடுத்து அடிப்போருமுண்டு, அவற்றுக்கு இடையூறின்றிக் கடந்து செல்வோருமுண்டு. அவற்றின் இருப்பே சாலைகளில் கூடாது என்று எண்ணி புகாரளிப்போரால் வண்டிகளில் ஏற்றிச் சென்று கொல்லும் ஆட்சிமன்றங்கள் என்றும் உண்டு. ஆனால், சாலைகளில் கலவியில் ஈடுபடும் ஞமலிகளுக்கு ஆட்சிமன்றம் பாதுகாப்பளிக்க வேண்டும் என்று கேட்கும் போலிப் பகுத்தறிவின் குரலுக்கு என்ன பதிலளிப்பது?

கலவி இயல்பானதே, புனிதமானதே. அவ்வாறிருக்கையில், அதற்குப் பாதுகாப்பளிக்க வேண்டிய நிலை ஏற்படுகின்றதென்றால் ஏதோ இயல்பற்றது நடக்கிறதென்ற பொருளையே தரும். கலவியில் இயல்பானதும், அல்லாததும், முறையானதும், முறையற்றதுமென எவ்வாறு வகைப்படுத்தலாம்?

முகம் நோக்கி நெஞ்சங்கலந்த கலவியானது, மனிதன் மற்றும் சிலந்தி வகைகளைத் தவிர வேறு விலங்கினமெதனிலும் கிடையாது. ஒரு சில தருணங்ளில் மட்டும் ஓரங்கட்டன்களில் நேர்வதுண்டு. நெஞ்சும்முதுகுங்கலந்த கலவியே பெரும்பாலான உயிரினங்களில் நேர்கிறது. தற்கலவியில் சந்ததியைப் பெருக்கும் இருபாலுறுப்புகள் கொண்ட சில புழுக்களும் உண்டு எனக் கேள்விப்படுகிறோம். ஆனால் தற்பாலினக் கலவி எந்த விலங்கினத்திலும் காணப்படுவதில்லை.

சிற்றின்பம் தேடும் வேட்கையை மட்டுமே கொண்ட உற்பத்தி தவிர்த்த கலவி மனிதனைத் தவிர வேறு எந்த உயிரினத்தின் இயல்பிலும் காணப்படவில்லை. உற்பத்தி தவிர்த்த எதிர் பால் கலவியே வெறும் வேட்கை மட்டும்தான் என்றால், தற்பாலினக் கலவி, இருபாலுறவு, விலங்கினக்கலவி ஆகியவற்றை என்னவென்று சொல்வது?

கோவில் கோபுரங்களில் உகவர், மாயிழை, இருபாலி, விலங்கினக் கலவிகளுமுண்டு என்று அந்நடத்தைகளைச் சிலர் ஆதரிக்கிறார்கள். அறச் செயல்கள் மற்றும் அறவோருடன் சேர்த்து, பாவச்செயல்களுக்கும், பாவிகளுக்கும் கூடக் கோபுரங்களில் இடமுண்டு. எனவே, அவற்றைச் சாத்திரமேற்கிறதென்றோ, கோவில் ஏற்கிறதென்றோ கொள்ள முடியாது. அவை அவற்றின் இருப்பை ஏற்றுக் கொள்ளக்கூடுமேயன்றி, மனிதர்கள் பின்பற்றக்கூடிய ஒழுக்கமாக அவற்றை ஒருபோதும் ஏற்காது.

இதுபோன்ற காரியங்களில் இயல்பென்றும், அல்லவென்றும் முடிவெடுப்பது யார்? அம்முடிவையும் எதனடிப்படையில் எடுக்க முடியும்?

சம்பந்தப்பட்ட பிறழ்புணர்தரப்புகளே இவற்றை இயற்கைக்கு மாறான, முறையற்ற கலவி என்று நூறு சதம் நம்பினாலும், நம் போலிப்பகுத்தறிவாளிகளால் நம்பமுடியாது. அஃது அவர்களின் இயல்பு.

எனினும், இயற்கையாகவே அலியாகவும், பேடாகவும் பிறக்கும் மனிதர்களுக்குச் சட்டத்தின் மூலம் இந்தச் சமூகத்தால் என்ன நீதியைச் செய்துவிட முடியும்?

எவரையும் துன்புறுத்தாமல், உடன்பாட்டுடன், தனிமையில் தங்களுக்குள் மட்டுமே நேர்கையில் இவற்றைத் தண்டனைக்குரிய செயல்களாகக் கருத முடியாது என்றாலும், சட்டம் போட்டு இவற்றுக்கு அங்கீகாரம் கொடுப்பதும், ஆதரவளிப்பதும் ஒருபோதும் தகாது.

மனிதர்களின் தனிப்பட்ட கலவிக் காரியங்களில் சம்பந்தப்பட்டவர்களின் அகக்குரலன்றி, நீதிமன்றங்களின் புறக்குரல் தலையிடத் துணிவது நிச்சயம் அறமல்ல. இஃது அரக்கத்தனம்.

அடையாள அரசியல்!

நாடு, இனம், மதம், மொழி, சாதி ஆகிய அடையாளங்களைக் கடந்த மனிதர்களாகவே நாம் இருக்க வேண்டும் என்று சொல்லும் பகுத்தறிவுவாதிகள், தங்களுக்கு வசதிப்படும் நேரங்களில் மட்டும் தங்களுக்குப் பிடித்த அடையாளங்களுக்குள் ஒளிந்து கொள்கிறார்கள்.

கம்யூனிஸ்ட், திராவிடன், சிறுபான்மையினத்தவன், நாத்திகன், தமிழன், கன்னடன், பிற்படுத்தப்பட்டவன், தாழ்த்தப்பட்டவன் என்ற நிலைகள் இவர்களுக்கு அடையாளங்களில் அடங்காதவை. அடையாளச் சிக்கலில் சிக்கி சீரழியும் இந்தப் போலிகள், தேசியவாதிகளின் அடையாள அரசியலைக் குற்றஞ்சாட்டுவது முரண்தொகையல்லாமல் வேறென்ன?

இருண்ட கண்டமாகத் தெரிய வேண்டும் என்று நாம் உயர்த்திய கொடிகளைப் போலவே, நமது உண்மை அடையாளம், மடமை / அறியாமை எனும் இருள்நிலையே.

அஸதோமா சத்கமய
தமஸோமா ஜ்யோதிர் கமய
ம்ருத்யோர்மா அம்ருதம் கமய
ஓம் சாந்தி சாந்தி சாந்தி:

உண்மையற்ற நிலையிலிருந்து உண்மை நிலைக்கு அழைத்துச் செல்வாயாக!
அறியாமை இருளிருந்து அறிவுப் பேரொளிக்கு அழைத்துச் செல்வாயாக!
மரணத்திலிருந்து மரணமிலாப் பெருநிலைக்கு அழைத்துச் செல்வாயாக!
அமைதி நிலைக்கட்டும்.

கல்லினுக்குள் அறிவொளி காணுங்கால்,
காலவெள்ளத் திலேநிலை காணுங்கால்,
புல்லினில் வயிரப்படை தோன்றுங்கால்,
பூதலத்தில் பராசக்தி தோன்றுமே!

விலையில்லா விளம்பரத் தூதர்கள்!

பிஜேபியை எதிர்க்கிறோம் என்ற பெயரில் காங்கிரஸ் செய்த ஊழல்களுக்குச் சப்பைக்கட்டுக் கட்டும் பரிதாப நிலை. பிஜேபியைத் தமிழகத்தில் காலூன்ற விடமாட்டோம் என்ற பெயரிலும், தங்கள் இருப்பைத் தக்க வைத்துக் கொள்ளவும் திமுகவுக்குச் சப்பைக்கட்டுக் கட்டும் படுபரிதாப நிலை. ஒட்டுமொத்தமாக நாட்டில் பிஜேபியை மூலைமுடுக்கெல்லாம் கொண்டு சேர்த்த விளம்பரத்தூதர்களே இந்தக் கம்யூனிஸ்டுகள்தான் . இவர்களின் இந்தத் தடு(ட)மாற்றமே பிஜேபியின் பலம்.

விஞ்ஞானச் சோசலிசம், பாட்டாளி வர்க்க சர்வாதிகாரம், ஏகாதிபத்திய எதிர்ப்பு, பகுத்தறிவு என்ற பெயரில் இனவெறி, மொழிவெறி, சாதிவெறி, மறைமுகமதவெறி, சுயவெறுப்பு ஆகியவற்றைத் தூண்டி போலிகளையே உண்டாக்கிக் கொண்டிருந்த கம்யூனிஸ்ட் கட்சிகளே இறுதியில் போலியாகிப் போனதுதான் முரண்நகை.



ராகுலைப் போன்ற எதிர்க்கட்சித் தலைவரும், மழையைக் கண்டு எக்காளமடும் தவளைகளாகக் குற்றமுள்ள சில்லரை எதிர்க்கட்சிகளும், எப்போதும் எதிர்த்தரப்பில் உள்ள இந்த விளம்பரத் தூதர்களும் கிடைக்க மோதியின் பிஜேபி கொடுத்து வைத்திருக்க வேண்டும். கண்ணுக்கு எட்டிய தொலைவில் பிஜேபிக்கு எதிரி என்று சொல்லக்கூட எவருக்கும் தகுதியில்லை.

கிட்டத்தட்ட எதிரிகளற்ற இந்தச் சர்வாதிகார நிலையை ஆளும் தரப்புக்கு ஏற்படுத்திக் கொடுத்தது இந்த விலையில்லா விளம்பரத் தூதர்களே என்றால் அது மிகையல்ல.

இவர்களின் இந்த ஆழ்துயிலே சர்வாதிகாரப்பொன்னுலகக் கனவின் மீளாத்துயிலாகட்டும். மானுடப் பொன்னுலகம் யார் மூலம் வந்தாலென்ன?